Thanks to my Lord Jesus Christ, so kase banyak berkat pa kita deng Eta. Dulu waktu pake motor bukang sadiki so mandi basah deng ujang di jalang. Ta pikir di kapala, "bae tare blum ada Ade, bagini nintau mo bagimana mo basah torang sama-sama, kasiang katu dy". So 1 tahun 7 bulan, torang kaweng mar bulum dapa-dapa Ade. Mar tetap torang terus berusaha dan berdoa. Lantaran itu bulan Juni lalu torang bertekat mo bli jo oto biar kredit. Jaga-jaga kong somo dapa Ade skaligus coba-coba bisnis Taxi glap/ rental oto.
Padahal masi blum lincah bawa oto, nda tau apa-apa dibidang Taxi glap/ rental oto, masi banyak tu utang di Bank.... mar spekol jo. Torang yakin kalo ada usaha kerja keras deng berdoa samua mo indah pada waktunya, Amin.
Nda hitung hari, mar depe malam jo dapa berkat yang lebe spektakuler dari tu oto. Lantaran Eta blum datang-datang depe bulan, pas lagi so ada oto, torang brangkat pi pa dokter Joice (Dokter spesialis kandungan) di paal 2. Eh... pas maso cuma kote depe asisten, masi muda, nintau lei kalo so kaweng. Mar biar jo maso jo. Cek para cek ternyata so ada kantung kehamilan kata dokter bilang, itu artinya kita pe istri so Hamil. "Oh.. thanks God, so double komang hari ini ngana kase pa torang".
Ibadah syukuran hari ini for oto akhirnya tatambah satu syukuran yang lebe fantastik
Sory so nda undang banyak-banyak lantaran ini cuma dikhususkan for ibdah keluarga. Nanti jo satu kali 'ada dy punya'.Dulu sebenarnya rencana mo bli oto kalo so ada Ade dulu biar dy nda mo basah kalo cuma pake motor. Mar ternyata pas bli oto eh, so positif lei kote. Torang percaya kalo itu bukan kebetulan mar so itu no depe rencana yang indah for torang keluarga. Mulai hari ini Episode baru dimulai. Thanks God, make us ready for that.
No comments:
Post a Comment